Gəncə Yeni ilin sehrinə düşüb

Gəncədə şəhər icra hakimiyyətinin və “GəncLand” istirahət və əyləncə mərkəzinin təşkilatçılğı ilə 31 Dekabr – Dünya azərbaycanlılarının həmrəlik günü və Yeni il münasibəti ilə bayram tədbirləri başlayıb. Gəncə sakinləri və şəhərimizin qonaqları üçün hər gün saat 17:00-da şəhərin baş meydanında konsert proqramı təşkil olunur. İlk olaraq sakinlər qarşısında F.Əmirov adına Gəncə Dövlət Filarmoniyasının kollektivi çıxış edib.

Konsert proqramını Yeni ilin əvəzolunmazlarından sayılan Şaxta baba və Qar qız açıq elan ediblər. Tamaşaçıları salamlayıb, xoş arzularını, diləklərini çatdırıblar. Daha sonra F.Əmirov adına Gəncə Dövlət Filarmoniyasının kollektivi 2 saatlıq konsert proqramı ilə şəhər sakinlərinin zövqünə oxşayıb. Respublikanın xalq artisti Sevinc İbrahimova, əməkdar artistləri Mehparə Cəfərova, Kəmalə Tağızadə, solistlər İlqar Vəlioğlu, Vasif Bayramov, Azər Verdiyev, Mirqasım Əliyev və digərlərinin ifasında Azərbaycanın xalq və bəstəkar mahnıları təqdim olunub.
Konsert proqramında müxtlif nağıl və cizgi film qəhrəmanlarının iştirakı da təmin olunub.
Xatırladaq ki, şəhərin əsas meydanında hündürlüyü 21 metrə olan küknar ağacı qurulub. Burada balacaların asudə vaxtının səmərəli və maraqlı keçməsi üçün müxtəlif atraksionlar quraşdırılıb. Ərazidə “Tir”, “Faceart” və sair fərqli əyləncələr üçün də şərait yaradılıb. Bununla yanaşı şəhərin baş meydanında 10 ədəd kiçik evcik qurulub ki, burada da müxtəlif yeyinti məhsullarının tanıtımı və satışı həyata keçirilir. Bayram günlərində mütamadi olaraq şou-proqramlar, uduşlu viktorinalar da baş tutacaq.
Saat 17:00-dan başlayan və Gəncə Regional Mədəniyyət İdarəsinin təşkilatçılığı ilə musiqili proqramlar Dekabrın 31-dək davam edəcək.
Dekabırın 31-də isə Yeni il və Dünya Azərbaycanlılarının Həmrəylik günü münasibəti ilə Gəncənin baş meydanında konsert proqramı təşkil olunacaq. Gəncə Yeni ili möhtəşəm atəşfəşanlıqla qarşılayacaq.