ƏLƏTDƏ QƏLƏTLƏR:

Qanunsuz qum karxanalarının gəlirləri kimlərin cibinə axır?

Əməkdaşımız Ə. İsgəndərov yaşadığı Qaradağ rayonunun Ələt qəsəbəsi ərazisində müşahidə etdiyi neqativ hallar barədə araşdırma materiallarını redaksiyaya təqdim etmişdir. Sözügedən ərazidə qanunsuz fəaliyyət göstərən "Samirə" və "Ric" məhdud məsuliyyətli cəmiyyətlərinin (MMC) ölkənin təbii sərvətlərini talayıb israf etmələri barədə müxbirimizin həm də sakin kimi fəal vətəndaşlıq mövqeyi ortaya qoyaraq ölkə başçısına və baş prokurora ünvanladığı müraciətləri baxılıb tədbir görülməsi üçün Ekologiya və Təbii Sərvətlər Nazirliyinin Ətraf Mühitin Mühafizəsi Departamentinə göndərilmişdir. Göstərilən faktlar Ə. İsgəndərovun sorğu ünvanladığı digər aidiyyati qurumlardan aldığı cavab məktublarında da öz təsdiqini tapır. Belə ki, Vergilər Nazirliyi 01.10.2016-cı il tarixli məktubunda apardığı araşdırma zamanı Qaradağ rayonu, Ələt qəsəbəsində yerləşən qum karxanasının həqiqətən də "Samirə" MMC-nə məxsus olduğunun müəyyən edildiyini , habelə həmin obyektdə keçirilmiş operativ vergi nəzarəti tədbiri nəticəsində MMC tərəfindən Əmək Məcəlləsində nəzərdə tutulmuş qaydada əmək müqaviləsi hüquqi qüvvəyə minmədən fiziki şəxsin işlərin (xidmətlərin) yerinə yetirilməsinə cəlb edilməsi və nağd pul hesablaşmalarının aparılması qaydalarının pozulması faktlarının aşkar olunduğunu təsdiqləmişdir.
Lakin Ətraf Mühitin Mühafizəsi Departamentinin direktoru cənab X.C. Hüseynov 02.11.2016-cı il tarixli cavab məktubunda iddia edir ki, guya İsgəndərovun iştirakı ilə ərizəsində göstərilən faktlar araşdırılıb və ikinci "Samirə" MMC-nin fəaliyyətinin qanunvericiliyin tələblərinə uyğun olduğu barədə məlumatsız olduğundan həmin şikayəti yazıbmış. İsgəndərov bütün bunları təkzib edir: "Heç kimə belə bir izahat verməmişəm. Qeyd olunan "Samirə" və "Ric" MMC-lərin hər birinə bir hektar torpaq sahəsi ayrıldığı göstərilsə də, Bakı-Salyan yolunun Ələt ərazisinə düşən 60-cı kilometrindən 80-ci kilometrliyinədək olan ərazisində təxminən 100 hektarlarla sahədən qum daşıyan karxanaların kimlərə işlədiyi bu günədək mənə və Qaradağ sakinlərinə məlum deyil. Həmin qum karxanalarından satılan milyonlarla ton qumdan nə dövlətə, nə Ələt Bələdiyyəsinə bir manat da olsun vergi ödənilməmişdir".
Ə. İsgəndərov hesab edir ki, yenidən müraciət etdiyi Baş Prokurorluq yanında Korrupsiyaya Qarşı Mübarizə İdarəsi tərəfindən departament sədrinin həqiqətə uyğun olmayan yayındırıcı məktubuna hüquqi qiymət verilməlidir. Həmçinin Ələt Bələdiyyəsinə qəsəbə ərazisinə aid edilən torpağın xəritəsinin indiyədək niyə verilməməsinin səbəbi araşdırılmalıdır.

Əhəd Baratoğlu