XXI ƏSRIN IKINCI ONILLIYINI DAŞ DÖVRÜ KIMI QARŞILAYAN AILƏ

Füzuli rayonundan məcburi köçkün, Beyləqan rayonunun Şərq qəsəbəsində məskunlaşmış Mirzəyeva Naridə Famil qızının ailəsi də mənzillə təmin olunacaq məcburi köçkün ailələrinin növbəli siyahısına salınmışdır. Komitədən Mirzəyevlərə və redaksiyamıza verilən cavab məktublarında təkrar-təkrar vəd olunur ki, “daha ağır şəraitdə yaşayan ailələr müəyyənləşdirilərək ilk növbədə qeydə alınacaq və onların da mövcud yaşayış vəziyyəti nəzərə alınaraq evlə təmin olunma məsələsinə baxılacaqdır”. Komitə mənsublarının laqeydliyi, insanların taleyinə biganəlikləri o həddə çatıb ki, məktublarında Mirzəyevlərin köçkün düşdükləri Füzuli rayonunun adını səhv salıb Laçın kimi göstəriblər.
Ailənin acınacaqlı yaşayış şəraiti ilə yerində tanış olub öz müşahidələrimizə əsasən belə qənaətə gəlmişik ki, vəziyyətləri nisbətən yaxşı olan başqa ailələr nəyəsə görə növbədə onlardan qabağa salınıb. Bu ayrı-seçkiliyin kökündə hansı səbəbin durması barədə mülahizə yürütmək istəmirik. Oxucuların öz mühakiməsinə buraxırıq. Xatırladaq ki, qəzetimizdə Mirzəyevlərin problemi ilə bağlı qələmə aldığımız ilk məqalə belə bir sərlövhə daşıyırdı: “XXI əsrdə daş dövründə yaşayan məcburi köçkün ailəsinin imdadına çatan olacaqmı?” İndi isə artıq 2020-ci ildir. Bu isə o deməkdir ki, Mirzəyevlər ailəsi XXI əsrin ikinci onilliyinə də daş dövründə keçmişdir.

Korrupsiya-q.az