Sisyandan qovulub, Yerevandan sığınacaq istəməyi düşünür – Əlillik təqaüdü kəsilən Sumqayıt sakini Prezidentdən kömək diləyir

İqtisadçı Qubad İbadoğlu deyir ki, vaxtilə ölkədə "saxta əlil" arayışları hesabına ölkədə əlilliyi olan şəxslərin sayı birdən-birə yüksəlmişdi, amma onun fikrincə, indi həqiqi əlilliyi olan şəxslərdə əlillik qrupunun təyini ilə bağlı "qarışıq, dolaşıq və uzunçəkən" bir proses tətbiq olunur ki, bu da yeganə dolanışıq mənbəyi əlillik pensiyası olan şəxslərin maddi durumuna ciddi təsir göstərir.
Sumqayıt şəhəri, 15-ci məhəllə, 5 saylı yataqxana, otaq – 27 ünvanda yaşayan Verdiyev Şahlar Allahverdi oğlu “Korrupsiya və Qanun” qəzeti redaksiyasına müraciət edərək bildirir ki, 2012-ci ilin may ayının 25-dən etibarən ona təyin olunmuş əlillik pensiyasının 2021-ci ilin iyun ayından kəsilib. Aidiyyəti strukturlara müraciət etsə də, pensiyasının bərpası üçün ona heç bir köməklik göstərilməyib. Son ümidini ölkə Prezidentinə və Birinci vitse-prezidentə bağladıını bildirən vətəndaş Verdiyev probleminin KİV-də ictimailəşdirilməsini redaksiyadan xahiş etmişdir.
1965-ci il təvəllüdlü, 1988-ci ildə Ermənistanın Sisyan rayonundan qaçqın düşən Verdiyev özünün və ailəsinin indiki naçar vəziyyətdən qurtulmayacağı təqdirdə “Yerevandan sığınacaqmı alım” deyə sual verir. 2010-cu ildən bu yana 6 dəfə cərrahi əməliyyata məruz qaldığını, daha bir əməliyyata ehtiyaclı olduğunu, ailədə özündən başqa daha bir ağır xəstə olduğunu, əlində 31dənə epikriz sənədi olduğunu deyən Verdiyev xatırlayır ki, Respublika Əlillərin Bərpa Mərkəzinin binasının 3-cü mərtəbəsində 2-ci masasında onu qəbul edən, adınnı unutduğu, “kök-dolu” həkim ona: “sənə əlillik dərəcəsi düşmür, sənə poensiya düşməsi üçün gərək bədəninin yarısı yox ola, get kimə şikayət edirsən et” deyib.