Millət vəkili kimi məktəb direktoru

O, təkcə məktəbli üçün deyil, müəllim və tərbiyəçi üçün, müxtəlif səviyyəli valideynlər, tədris-yardımçı heyət və texniki işçilər üçün də nümunədir desək, yanılmarıq. Məktəb direktoru vəzifəsini daşıması onun öz ixtisasını dərindən bilməsi ilə tamamlanır; tədris etdiyi fənnin metodikası sahəsindəki yenilikləri müntəzəm olaraq izləyir, həmin fənn müəllimləri arasında qabaqcıllar arasında durur. Təhsil müəssisəinin ərhbəri kimi hər gün dərin biliyə malik müəllimlər qarşısında hesabat verəcəyini unutmur. Hesab edir ki, hər hansı müəllimin bu və ya digər beynəlxalq məsələ, elmi-texniki yenilik haqqında və ya pedaqoji problemlərə dair suallarını cavabsız qoymağa mənəvi haqqı yoxdur. Birinci sinif müəllimi uşaqların ona yağdırdıqları sualların hamısına cavab verməyə çalışdığı kimi, direktor da ona müraciət edənlərin bütün sualları ətrafında fikir söyləmək imkanına malikdir.
Haqqında söhbət açdığımız Kərəmov Elnur Cahil oğlu 17 iyul 1981-ci ildə Lənkəran rayonunun Kərgəlan kəndində anadan olub. 1998-ci ildə orta məktəbi bitirib Gəncə Dövlət Universitetinin filologiya fakültəsinə daxil olub. Ali məktəbi bitirdikdən sonra 2003-2004-cü illərdə Naxçıvan MR-da döyüş bölgəsində hərbi xidmətdə olmuşdur.
2004-cü ildə Lənkəran rayonu Ləj kənd tam orta məktəbinə müəllim təyin olunmuşdur. 2012-ci ildə Təhsil Nazirliyinin direktorlar üçün keçirilən müsahibəsində iştirak etmiş və uğur qazanaraq yüksək nəticə ilə (respublikada 23-cü, rayon üzrə 1-ci) Lənkəran ragonu Balıqçılar qəsəbə tam orta məktəbinə direktor təyin olunub.
2014-cü ildə öz ərizəsinə əsasən Lənkəran rayonu Kərgəlan kəndinə müəllim təyin olunub. 2021-ci ildə Elm və Təhsil Nazirliyi tərəfindən keçirilən DİQ müsahibəsində iştirak edib və uğur qazanaraq Lənkəran rayonu Vel kənd tam orta məktəbinə direktor təyin edilib.
Evlidir.
Elnur Kərəmovun şagirdləri olimpiadalarda gözəl nəticələr göstərib, daim yüksək ballar ilə ali məktəblərə qəbul olunublar. Şagirdlərinin hər uğuruna sevinən Elnur müəllim onların müvəffəqiyyət tarixçələrini özünün sosial şəbəkədəki səhifələrində paylaşır.
Əvvəldən ədəbi yaradıcılığa meylli olan Elnur müəllimin həm də gözəl qələmi var. "Məşəl"jurnalında 20-yə yaxın elmi və publisistik məqalələri və hekayələri işıq üzü görüb. Filoloji ustalıq nümayiş etdirdiyi əsərləri sevilərək oxunur.
Elnur müəllim yüksək ideyalı, iradsız, saf mənəviyyatlı, siyasi cəhətdən hazırlıqlı, ölkədə və beynəlxalq aləmdəki hadisələrdən baş çıxarmağı bacaran, rəhbər dövlət sənədlərini müntəzəm olaraq izləyən, şəxsi həyatında təmiz adamdır.
İdarəetmədə səriştəlidir, tabeliyində olan işçilərin hər birinə göstəriş, təklif və məsləhət verə bilmək səviyyəsindədir. Adamları tanımağı, onlarla işləməyi, hər kəslə psixoloji kontakta girməyi bacarır.
Rayonun ictimai işlərində yaxından iştirak edir, fəal vətəndaşlıq mövqeyinə malik ziyalıdır, elinin nüfuzunu qoruyan, adət-ənənələrinə, mənəvi dəyərlərə hörmət edən, tapdalanana dəstək verən, millətin sevincinə də, kədərinə də şərik olan ləyaqətli vətəndaşdır.
Çox hörmətli Elnur müəllimə rəhbər vəzifədə, pedaqoji fəaliyyətində və elmi-ədəbi yaradıcılığında yeni-yeni müvəffəqiyyətlər arzulayırıq. İnanırıq ki, yeni 2023-cü ildə onun özünün də, rəhbərlik etdiyi kollektivin də, şagirdlərinin də nailiyyətlərinin sırası artacaq.
Aynur Ədalətqızı