Təbrik edirik! - Ot kökü üstündə bitər

Qəzetimizin ənənəvi dostu, 20 Yanvar Cəmiyyətinin Cəlilabad rayon şöbənin sədri Mirşamil Mürsəlov redaksiyamıza zəng vuraraq nəvələri Mürsəlov Miradilin və Mirəjdərin imza atdıqları uğurun sevincini bizimlə bölüşmüşdür. Azərbaycan Respublikası Şotokan Karate-Do Klubunun 30 mart 2019-cu il tarixdə təşkil etdiyi yoldaşlıq yarışında 8-9 yaşlı yeniyetmələr arasında Miradil I, Mirəjdər isə II yer qazanaraq klubun Diplomlarına layiq görülmüşlər. Miradili və Mirəjdəri, Mürsəlovlar ailəsini sevindirən, balaca idmançıları gələcək daha böyük qələbələrə ruhlandıran diplomları klubun prezidenti cənab Ayaz İbişov və baş məşqçi Əzizov Hikmət müəllim imzalamışlar.
Veteran babasından döyüşçü ruhu əxz edən Miradili və Mirəjdəri kollektivimiz adından təbrik edir, onlara dərslərində və idmanda daha böyük müvəffəqiyyətlər arzulayırıq. İnanırıq ki, onlar, gələcəkdə beynəlxalq arenalarda, möhtəşəm turnirlərdə Azərbaycanın idman şərəfinə şərəf qatacaq, üçrəngli bayrağımızı yüksəklərə ucaldacaq, himnimizi səsləndirəcəklər.