Azərbaycanda ŞOK OLAY: Kiberdələduz vətəndaşla 40 dəqiqə görüntülü danışdı və...

Xəbər verdiyimiz kimi, aprelin 8-də vətəndaşların 87 min manatdan çox pulu talanıb.

Xəbər verir ki, ayrı-ayrı vətəndaşların bank kartlarından 20000, 17000, 16000, 15000, 7800, 4650, 2538, 1006, 900, 850, 500, 350, 200, 107, 60, 56 və 50 manat məbləğində pul oğurlanıb.

Həmçinin Salyanda 17 min manatı talanan vətəndaşla 40 dəqiqə görüntülü danışıblar ki, kartınıza müdaxilə var, kömək edirik. Naməlum şəxs nə deyibsə, nə təlimat veribsə bir-bir icra edib. Hətta telefonun dilini də dəyişdiriblər ki, bildirişləri anlamasın, pulu çıxara bilsinlər.

Məsələ ilə bağlı sorğumuza cavab olaraq Daxili İşlər Nazirliyinin (DİN) Mətbuat Xidmətinin bölmə rəisi Nurlan Əliyev qeyd edib ki, kibertalamalarla bağlı vətəndaşlardan daxil olan müraciətlərə polis tərəfindən xüsusi həssaslıqla yanaşılır:

“Görülən tədbirlərlə vətəndaşları müxtəlif üsullarla aldadıb vəsaitlərini talayan bir çox şəxsin müəyyən olunaraq məsuliyyətə cəlb olunması polis tərəfindən təmin olunub”.

N.Əliyevin sözlərinə görə, araşdırmalar zamanı müşahidələr onu göstərir ki, kiberhücumların əksəriyyəti ölkə xaricindən baş verir.

Sonda Nurlan Əliyev vətəndaşlara bir daha xəbərdarlıq edib:

“Vətəndaşlara şübhəli zənglərdən gələn cəlbedici qazanc, sığorta, bank hesablarının möhkəmləndirilməsi, mədaxil üzrə ödənişlərlə əlaqəli təkliflərə diqqətlə yanaşmağı tövsiyə edirik. Qəti formada şəxsi bank məlumatlarını naməlum şəxslərə verməyin, təhlükə var”.