Lənkəranda maşın kollektora düşdü: 2 yaralı

Lənkəranda iki nəfərin xəsarət alması ilə nəticlənən yol-nəqliyyat qəzası baş verib. APA-nın cənub bürosunun məlumatına görə, hadisə gecə saatlarında Ələt-Astara magistralının 202-ci kilometrliyində, yolun rayonun Digah kəndi ərazisində keçən hissəsində qeydə alınıb.

Lənkəranın Digah kənd sakini, 35 yaşlı Raqib Ramazanov idarə etdiyi “VAZ-21003” markalı, 42 BC 734 dövlət nömrə nişanlı minik avtomobili hərəkətdə olarkən qəfildən idarəetməni itirərək yolun kənarındakı suötürücü kollektora düşməklə, eyni zamanda beton divara çırpılıb.

Güclü zərbədən sürücü və onun yanındakı sərnişin, rayonun Sütəmurdov kənd sakini, 24 yaşlı Vüsal Musayev müxtəlif dərəcəli bədən xəsarətləri ilə Lənkəran Mərkəzi Rayon Xəstəxanasına yerləşdirilib. İlkin versiya kimi qəzanın avtomobilin sürücüsünün düzgün ötmə əməliyyatı aparmaması səbəbindən baş verdiyi bildirilir.

Faktla bağlı Daxili İşlər Baş Dövlət Yol Polisi İdarəsinin istintaq və təhqiqat şöbəsində araşdırma aparılır.