“Mersedes” ağaca çırpıldı, yaralılar var

Mingəçevir şəhərində 3 nəfərin ağır yaralanması ilə nəticələnən yol-nəqliyyat hadisəsi baş verib. EL TV (Region TV) xəbər verir ki, hadisə gecə saatlarında, 20 Yanvar küçəsində qeydə alınıb.

“Mersedes” markalı avtomaşının sürücüsü, Mingəçevir sakini, 1987-ci il təvəllüldü Ayaz Şirəli oğlu Qasımov qəfildən avtomaşınının idarəetməsini itirib. Avtomobil əvvəlcə yolun kənarında dayanan “VAZ 21 099” markalı avtomobilə, sonra isə səkiyə qalxaraq ağaca çırpılıb.

Nəticədə sürücü ilə yanaşı “Mersedes”dəki sərnişinlər - Mingəçevir sakinləri, 1987-ci il təvəllüdlü Yaşar Şura oğlu Xudiyev və 1978-ci il təvəllüdlü Vüqar Akif oğlu Bəkirov ağır bədən xəsarətləri alıblar. Onlar Mingəçevir şəhər Mərkəzi Xəstəxanasına çatdırılıblar. Xəstələrin vəziyyəti ağır olaraq qalır.

Faktla bağlı Mingəçevir Şəhər Polis Şöbəsi tərəfindən araşdırma aparılır.