Dostunun ölümündən şok keçirən Ağamirzə: "Nə qədər qışqırdım, gözünü açmadı"

Tanınmış meyxana ustası Bayram Kürdəxanılını avtomobillə vuran adamın tanınmış meyxanaçı Ağamirzənin qohumu olduğu deyilir.
Korrupsiya və Qanun saytı xəbər verir ki, yeniçağ.az-a açıqlama verən Ağamirzə xəbəri təsdiqləyib.
“Bayramı vuran Emin mənim uzaq qohumumdur. Kim istəyərdi ki, belə hadisə olsun?! Emin danışır ki, hadisə baş verən zaman avtomobili yüksək sürətlə idarə etməyibmiş. Bayram qəfildən avtomobilin qarşısına çıxıb, Emin avtomobili qaçırtsa da, xeyri olmayıb. Elə özü də onu xəstəxanaya çatdırıb”.
Ağamirzə gecə xəstəxanada Bayramın yanında qaldığını deyib: “Reanimasiyada idi, içəri girdim, qardaşı da mənimlə idi. Nə qədər çağırdım ki, Bayram, gözünü aç, yanındayam, eşitmədi. Komadaydı. O boyda türmədə ölməyəsən, gəlib bir avtomobilin altında qalasan. Qismətə bax. Hələ də şokdayam, özümə gələ bilmirəm”.