Köçkün, ailəli qardaşların “52” dərdi

Füzuli rayonundan məcburi köçkün Şəmiyev Emin Asif oğlunun da neçə ildir davam edən evsizlik mücadiləsi 2020-yə adladı. Özünün və qardaşı Sənanın gənc südəmər uşaqlı ailəsi ilə birgə məskunlaşdıqları Yasamal rayon 52 saylı tam orta məktəbin həyətindəki tikilidən məktəb direktorunun fitvası ilə qovulması üçün işığını, qazını da kəsdilər. Gənc ailəyə dəstək verən “Korrupsiya və Qanun” qəzeti bu mövzuya həssas yanaşaraq bir neçə məqalə dərc edəndən, aidiyyati qurumlara müraciət edəndən sonra nəhayət ki, Yasamal Rayon İcra Hakimiyyətindən bu məzmunda bir məktub almağa nail oldu: “52 saylı tam orta məktəbin ərazisindəki tikilidə məskunlaşmış məcburi köçkünlərin məskunlaşdıqları tikilidən çıxarılması nəzərdə tutulmur, lakin zərurət yaranacağı təqdirdə məcburi köçkünlər yaşayış sahəsi ilə təmin olunacaqlar”.
O zaman dərc etdiyimiz növbəti məqalədə ortaya belə bir sual qoyduq: ”Əgər həmin tikilinin elektrik enerjisi ilə təchizatı kəsilibsə, qazla təminatı yoxdursa, orada məskunlaşmış məcburi köçkünlərin başqa yaşayış sahəsi ilə təmin olunması zərurəti yaranmayıbmı?” Hələliksə, Şamıyevlər bu zərurətin “Qaçqınkom” tərəfindən nə vaxt ödəniləcəyini gözləməkdə, uşaqlarını məhrumiyyətlər içində böyütməkdədirlər.

Korrypsiya-q.az