İmtahan cavablarını üzündən köçürən müəllimə üstünlük verilir

Füzuli rayonu 39 saylı tam orta məktəbin ibtidai sinif müəllimi Abbasova Asya İsmayıl qızı “Korrupsiya və Qanun” qəzeti redaksiyasına yazılı müraciət edərək, işlədiyi məktəbdə haqsızlıqla üzləşdiyini, hüquqpozamalara məruz qaldığını bildirmiş, qarşılaşdığı problemin mediada ictimailəşdirilməsini xahiş etmişdir.
Yazır ki, 23 ildir pedaqoji fəaliyyətlə məşğuldur, işlədiyi müddətdə müəllim adını daim uca tutub, qüsursuz işləyib: “Lakin bu gün mənə təhsil sektorundan bildiriblər ki, kimin sertifikasiya balı çox olsa, birinci sinifi ona verəcəyik. Yəni, diplomu saxta (dövlət nümunəli olmayan), hansı yollarlasa diaqnostik qiymətləndirməyə buraxılan, sertifikasiya imtahanında arxada oturub köçürdüyünə görə iki dəfə xəbərdarlıq edilən, 2023-cü ilin may ayında tədbir zamanı şagirdlərin, müavinlərin, direktorun gözü qarşısında şagirdi vurub töhmət alan Süleymanova Pərvanə Elman qızına veriləcək, dördüncü sinifə mən varislik edirəm, o isə yığma dərslər deyib, heç vaxt onunla paralel sinifim olmayıb”.
Bununla belə Asya Abbasova nikbindir: “Mən inanıram və ümid edirəm ki, haqq öz yerini tapacaq. Cənab Prezidentimiz İlham Əliyev hər çıxışı zamanı qeyd edir ki, saxtakarlıqlar barədə lazımi orqanlara məlumat verin. Mən dövlətimə və onun ali qanunlarına inanıram, əvvəlcədən minnətdaram!”
Biz də ümid edirik ki, məlumat ictimailəşdirildikdən sonra aidiyyəti qurumlar sözügedən məsələnin çözülməsi üçün lazımi tədbirlərin görülməsini təmin edəcəklər.