Alman qadınla ailə quran Sumqayıt sakininin şəhər polisi ilə problemi 2025-ci ildə həll olunacaqmı? – Maraqlarına toxunan sənədlərlə tanış olmasına şərait yaratmırlar

Sadiq oxucularımız xatırlayarlar, “Korrupsiya və Qanun” qəzeti redaksiyasına daxil olmuş müraciət əsasında qəzetin 01.12.2023-cü il tarixli sayca 10 (102)-cu nəşrində “Sumqayıt polisində soyğunçuluq: Qonşularını üzünə durğuzub 25 min pulunu aldılar” sərlövhəli birinci və 31 yanvar 2024-cü il tarixli 01(104)-cü sayında “DİN-nin Baş İstintaq və Təhqiqat İdarəsi Sumqayıt polisinin soyğunçuluğuna göz yumdu” sərlövhəli ikinci, “20 noyabr 2024-cü il tarixli 10 (113) – cü sayında “Sumqayıt polisi aldadıb ər tutmağı kimdən öyrənib?” başlıqlı üçüncü məqalə dərc olunmuşdu. Müraciət müəllifi - Sumqayıt şəhəri, məh. – 45, ev 6/79, mən. – 3 ünvanda qeydiyyatda olan, 1981-ci il təvəllüdlü Abdurəhmanov Pərviz Arif oğlu “Korrupsiya və Qanun” qəzeti redaksiyasına polis əməkdaşları tərəfindən şərlənərək pullarının mənimsənildiyini bildirmişdi.
Vətəndaş Abdurəhmanov yazırdı ki, onu polis idarəsində təpiklə döymüş, elektroşokdan istifadə edərək bütün bədəninə xəsarət yetiriblər. Polislərdən Eldənız, Elnur, Cavidan və s. adlarını çəkmiş, Sumqayıt Səhər Polis İdarəsində işləyən Əsgər adlı müstəntıqdən şikayətlənmiş Pərviz Abdurəhmanov qeyd etmişdi ki, narahat edilməməsi, bir də bu vəziyyətə düşməməsi və heç bir hadisə olmamış kimi polis idarəsindən rahatlıqla getməsinin müqabilində ondan 25000 (iyirmi beş min) manat əvəzinə 15000 (on beş min) avro rüşvəti məcburi aldıqdan sonra izahatı alınaraq buraxılıb. Pulu verəndən sonra üzünə durğuzulan yalançı “zərərçəkən” və yalançı “şahidlər” sözlərini dəyişiblər.
“Sumqayıt Şəhər Baş Polıs İdarəsı əməkdaşları tərəfindən deyil, tanımadığım şəxslər tərəfindən döyüldüyümü deməyə isə məni polis əməkdaşlarının “biz istəsək, sən heç vaxt azadlığa cıxmazsan” sözlərı ilə hədə - qorxu gəlmələri vadar etdi. – “sən şıkayət etsən, biz də səndən şikayət edərik. Sonunda sənə yox, biz polislərə inanacaqlar. Kimə nə şikayət edirsən et, sonunda prokuror bu işə baxacaq, o da bizimlə birlikdə hər gün çay içir” – dedilər”.
Pulunu geri almaq və onu döyən polis işçilərinin cəzalandırılmasına nail olmaqda israrlı görünən şikayətçi məruz qaldığı hüquqpozma və soyğunçuluq faktının KİV- də ictimailəşdirilməsini və aidiyyəti qurumlara çatdırılmasını redaksiyamızdan xahiş etmişdi.
İş materiallarında olan Sumqayıt şəhər Polis İdarəsinin İstintaq Şöbəsinin baş müstəntiqi, polis kapitanı Təhməzli Bəhram Namiq oğlunun icraatında olan HK- 1/1365 saylı iş üzrə 03 noyabr 2023-cü il tarixli “cinayət işinin başlanmasının rədd edilməsi haqqında” qərarının preambulasında Pərviz Abdurəhmanov elə təqdim olunurdu ki, sanki o, yaşadığı məhəllədə xuliqanlıq etməyi özündə bir növ vərdişə çevirmiş, necə deyərlər, “yetdiyinə yetirmiş, yetmədiyinə daş atırmış”.
Məqsədlərinə nail olandan sonra isə onun üçün “xilasedici” nüanslar tapmağa çalışıblar. Materialdakı şahid ifadələrində ara-sıra gözə dəyən “Hadisə zamanı ucadan səs-küy olmamışdır”, “Pərviz onun (Gülgünün) koftasını cırmamış, əsəbi olduğu üçün ərizəsində belə yazmışdır”, “Pərviz Fuadı söysə də, ucadan söyməmişdir” kimi ifadələr də bu məqsədə xidmət edib.
Sumqayıt polisinin istintaq təcrübəsində əcaib presendentlər tətbiq edilib - “Şikayətçi hirsli olduğu üçün şər atıb”; “şübhəli şəxs söyüb, amma ucadan söyməyib”; “vurub, amma xəsarət yetirməyib...”
Məqalələrin dərc olunduğu qəzet nüsxələrini müşayiətedici məktublarla aidiyyəti qurumlara göndərib obyektiv araşdırma aparılmasını və nəticə barədə redaksiyamızın məlumatlandırılmasını xahiş etmişdik. Daxili İşlər Nazirliyinin Baş İstintaq və Təhqiqat İdarəsindən 18.12.2023-cü il tarixli cavab məktubunda bildirilirdi ki, Prezident Administrasiyasından daxil olmuş müraciətimizə baxılıb: “Müəyyən olmuşdur ki, Pərviz Abdurəhmanov tərəfindən döyülmələri ilə bağlı Fuad Quliyev və Gülgün Nəsirovanın şikayətləri üzrə Sumqayıt şəhər Polis İdarəsinin istintaq şöbəsində araşdırma aparılaraq 9 oktyabr 2023-cü ildə əməldə cinayət tərkibi olmaması əsası ilə Azərbaycan Respublikası Cinayət-Prosessual Məcəlləsinin 39.1.2 maddəsinə əsasən cinayət işinin başlanılmasının rədd edilməsi haqqında qərar qəbul edilmişdir. P. Abdurəhmanovun şəhər prokuroruna, yuxarı prokurora və məhkəməyə şikayət etmək hüququ vardır”.
P.Abdurəhmanov 07.11.2024-cü il tarixdə yredaksiyamıza növbəti yazılı müraciət etmiş, məlum məqalələrin işıq üzü görməsindən sonra polisin onunla rəftarını təsvir etmişdir: “Sumqayıt şəhər Polis İdarəsinə yazılarınızdan sonra mən Tural Əhmədli tərəfindən İdarəyə çağırıldım. Mənə şikayətimlə bağlı belə bir hadisə olmadığını, guya əsəbi halda olduğum üçün şikayət yazdığımı boynuma götürməyi təklif etdilər. Lakin mən bununla razılaşmadım, məni döyərək işgəncə ilə aldıqları 15000 avronu özümə qaytarmaları, aldığım xəsarətlərdən dolayı mənə dəymiş ziyanın qarşılığını ödəyəcəkləri təqdirdə barışıq ərizəsi yaza biləcəyimi dedim. Bu səbəbdən də Tural Əhmədli mənə hədə-qorxu gələrək ağır nəticələrlə üzləşəcəyim, həbs olunacağım barədə xəbərdarlıq etdi. Bundan sonra mən rüşvət aldıqları pulu mənə qaytaracaqları şərti ilə onların istədikləri ərizəni müstəntiq Bəhram Təhməzlinin iştirakı ilə yazıb Tural Əihmədliyə verdim. Ərizəmi aldıqdan sonra həmin polis əməkdaşlarından pulumu istəsəm də, onlar vədlərinə əməl etməyərək həmin vəsaiti ödəməkdən qəsdən yayınırlar. Bu günədək faktla bağlı aidiyyəti rəsmi şəxslərə dəfələrlə müraciət etsəm də, faydası olmayıb”.
Görünən odur ki, P.Abdurəhmanovun polislə problemi 2024-cü ildə həll olunmamış qalmışdır. Bəs onun yeni 2025-ci ildən gözləntiləri nədir? Sonuncu məqalədən ötən müddət ərzində baş prokurorluq şikayətçinin müraciətini 24.01.2025-ci il, 30.01.2025-ci il tarixli məktubları ilə Sumqayıt şəhər prokuroru Mürvət Həsənova göndərmiş və bu barədə P.Abdurəhmanovun özünə və milliyyətcə alman olan həyat yoldaşına məktubun digər nüsxələri ilə məlumat verilmişdir. Nəticə yoxdur! Bu azmış kimi, polis əməkdaşlarının öz cinayət faktlarını ört-basdır etmək üçün qabaqlayıcı tədbir kimi, guya tərəfindən törədilmiş xuliqanlıq cinayət işinə 02.11.2023-cü il tarixdə xitam verilməsi haqqında qərarın surəti və 740c-23 saylı iş materiallarındakı maraqlarına toxunan digər sənədlərlə tanış olmasına şərait yaratmırlar. Baxmayaraq ki, bu barədə 26.12.2024-cü il tarixdə ərizə ilə şəhər prokuroruna müraciət edib.

Mövzuya qayıdacağıq.

Baş redaktor Xuraman Quliyeva